Nepal airport-ah Turkey thlawhtheihna a kang

Turkey Airlines thlawhtheihna chu nimin khan Nepal airport-ah a ṭum dawnin a kang a, airport pawh khar a ngaih phah. Hliam erawh an awm lo nia sawi a ni.

Istanbul aṭanga thlawk chhuak, mi 277 chuanna Airbus 330 hi Kathmandu-a Tribhuvan International Airport-ah a ṭum laiin a landing gear ding lam a kang a ni. Emergency crew-te chuan kangmei chhuak hi an lo thunun vat a, a chuangte pawh him takin hruai chhuah vek an ni tih airport official-te chuan an sawi.

Kangmei chhuak vang hian Kathmandu pan tur thlawhtheihna dangte chu tihkhawtlai an ni a, official-te chuan thil thlen dan hi an chhui chiang nghal a ni. Kum 2015 khan Turkey thlawhtheihna pakhat chu Kathmandu airport-ah vek hian chhum chhak tak kara a ṭum chu a lo chesual tawh bawk a, mahse, thi leh hliam an awm lo. Thlawhtheihna hi a hnuah la chhuakin, museum-ah an siam zui a ni.