Thailand PM hlui Thaksin jail aṭangin chhuah

Thailand prime minister hlui, Thaksin Shinawatra chu nimin zing khan thla riat a tan hnuah Bangkok jail aṭangin chhuah a ni.

Kum 76 mi, telecoms billionaire Thaksin hi eiruk thubuaia kum khat tang tura hrem a ni a, jail-ah thla riat a tang tawh a, a tan hmabak hi in aṭangin a tlak dawn a; mahse,a chet velna thlithlai reng a nih theihna turin a keah electronic monitor vuah tir a ni thung ang. Thla hmasa khan Supreme Court chuan Thaksin hi a kum a upat tawh avangin jail aṭangin chhuah tir hma a ni dawn tih a lo sawi tawh a ni. Nimin zinga Bangkok-a Klong Prem jail aṭanga chhuahtir hian jail pawnah a chhungte leh amah thlawptu mi tam takin an lo hmuak a ni.

Thaksin hi kum 2001 leh 2005 khan Thailand prime minister atan thlan tlin a ni. Mahse, a term hnihna a zawh hmain sipai chakna hmangin a kaihhruai sorkar paihthlak a ni a, ram pawnah himna zawngin a tlanchhe nghal a, kum 15 vel ram dangah a khawsa a ni. Kum 2023 August thla khan an ramah kir lehin, eiruk thubuai leh prime minister a nih laia a thuneihna dik lo taka hmanga puhnaah thiam loh chantirin kum riat tang tura hrem a ni. Hremna tihchhuah a nih hnuah pawh jail-ah darkar rei lo te chauh a awm hnuin, a lung leh awm lamah harsatna a nei nia sawiin hospital-a private room-ah dah a ni a, thla ruk a awm a ni. A hnuah an ram lal-in hremna hi kum khatah a tihtawi sak leh bawk.

Thaksin-a party, Pheu Thai Party hi Thailand-a political party hlawhtling bera sawi a ni ṭhin. Mahse, kumin February-a inthlanpui an neihah khan seat nei tam pathumna a ni a, conservative prime minister Anutin Charnvirakul kaihhruai ṭangrual sorkarah an tel a ni. Thaksin-a tupa, Yodchanan Wongsawat chu PM Anutin-a cabinet minister zingah a tel. A fanu, Paetongtarn Shinawatra chu kum 2024 khan prime minister a lo ni tawh bawk a, Thailand PM ni thei zinga naupang ber a ni. Mahse an ram ṭhenawm, Cambodia ram hruaitu hlui Hun Sen nena an inbiaknaah, Thailand army commander sawisel a, ramria an buaina chungchangte a sawi danah an ram inkaihhruai dan bawhchhiaa puh a ni a, Constitutional Court chuan PM a nihna aṭangin a ban a ni.