Pakistan-a inbeihna thlengah mi 14 an thi

Pakistan hmarthlang lam,Afghanistan ramria awm Khyber Pakhtunkhaw province-a Bannu district-a security post chu Inrinni khan thihchilh bomb hmanga beih a ni a, police officer 14 an thi.

Police official Sajjad Khan chuan thihchilh bomb tihpuah a nih hnuah, silai keng mi eng emaw zat chuan post hi an bei zui tih a sawi. Police offier ṭhenkhat chu inbeihnaah an thi a, ṭhenkhat chu bomb tihpuah vanga in chimin a delh hlum an awm bawk. Security force chuan pawikhawihtute man chhuah tumin beihpui an thlak zui nghal a ni.

Helpawl ding thar, Ittehad-ul-Mujahideen Pakistan chuan he pawikhawihna thleng hi an tih a nih thu media-te an hrilh. An pawl hi Pakistan Taliban, Tehrik-e-Taliban Pakistan (TTP) hnuaia pawl din thar nia sawi an ni.

Pakistan-ah hian firfiakte pawikhawihna a thleng ngun hle a, a tam zawk hi TTP te thlen a ni. Sorkar chuan Afghanistan-a Taliban sorkar chuan TTP hi a puih ṭhin bakah an rama awm pawh a phalsak a puh a, mahse Taliban sorkar chuan a puhna hi a pha thung.