Hantavirus kai hmuhna lawngin Spain a thleng

Hantavirus hri darhna, cruse ship MV Hondius chuan nimin khan Spain-a Canary Island-a Granadilla de Abona lawng chawlh hmun a thleng. Lawnga chuangte hi an dinmunte enfiah a nih hnuah an in lam pan phalsak an ni ang.

Dutch flag inzarna MV Hondius hi Netherlands pan a ni a, lawnga chuang zingah hantavirus hri a darh hnuah mi pathum chu he hri vang hian an thi tawh a ni. Hri kai nia hriat mi pariat an awm bawk. He lawnga hantavirus hmuh hi mihring leh mihringa inkai theih, Andes virus a nih avangin khawvel pawhin a ngaihven zui hle a ni.

World Health Organisation (WHO) chuan lawnga chuangte pawh uluk taka enfiah leh, a hri kaite pawh enkawl an nih avangin mipui nawlpuia hri a darhna theihna a hniam hle tih an sawi. Inrinni khan WHO hotu, Tedros Adhanom Ghebreysus chuan Spain hi thlengin, lawnga chuangte hruai chhuah leh enfiahna kalpui tur pawh a enpui dawn a ni. Ghebreysus chuan mipui chu chiai lo tura tiin, Covid ang kha a ni lo tiin a sawi. Enfiah hna pawh uluk taka kalpui a ni dawn a, hemi atan hian Spain pawh a inbuatsaih ṭha tawk a ni, a ti.

WHO chuan hri kai nia rinhlelh mi pariat zinga paruk chu an kai ngei tih nemngheh a ni tawh a, a bak lawnga chuang mi dang zingah hri kai rinhlelhawm an awm tawh lo tih a sawi. Kar hmasa lam khan hri kai pathum chu enkawl turin hruai chhuah an lo ni tawh a ni.

MV Hondius hian April 1 khan Ushuaia, Argentina aṭangin a kal chhuak a, Atlantic Ocean kaltlangin Cape Verde a pan a ni. Ram hrang hranga health thuneitute chuan he lawnga chuang, chhuk tawh zingah hri kai nena in contact an awm em tih an chhui zui mek bawk.