Israel court-in Gaza flotilla activist-te ngenna hnawl

Israel court chuan Gaza pan tum lawng ruala chuang, foreign activist pahnihten hren an nih chungchanga appeal an theh luh chu a hnawlsak.

Iserael sipaite chuan kar liam ta kartawp khan Gazan pan tum lawng rualte chu tuipuiah an lo dang a, activist-te chu thu zawhfiah turin an hruai a ni. Lawnga chuang activist dangte chu Greece-a Crete island-a hruai an ni a, a hnuah chhuah zui an ni. Mahse, mi pahnih - Palestinian origin Saif Abu Keshek leh Brazil mi, Thiago Avila te erawh chu Israel-ah hruai an ni a, Thawhlehni khan court chuan police-ten thu an zawh chhunzawm theihna turin Pathianni thleng an hren a phalsak. Hemi hnuah activist pahnihte lawyer hian hren an nih chungchangah Beersheva district court-ah appeal an theh luh a ni. Activist pahnihte hian chhuah tura phutin chaw ngheiin nawrh an huaihawt bawk.

Israel thuneitute chuan an mi hren pahnihte hi Popular Conference for Palestinians Abroad (PCPA) hnuaia mi an nih thu sawiin, he pawl hi US-in Palestinian firfiak pawl, Hamas tana thawktu nia a lo puh tawh a ni. Spain, Brazil leh United Nations chuan activist pahnihte hi chhuah turin an ngen a ni.

Israel hian Gaza Strip luhka, khawmual leh tuipui lamte a thunun vek a ni. Heng lawng rualte hi France, Spain leh Italy aṭanga kal niin, Israel-in Gaza a danna chu paltlang a, Gaza Strip-a chhawmdawlna pek tuma kal an ni. Israel sipaiten kir tura an hrilh hnuah an kir duh loh avangin an lawngte hi dangin, activist-te hi an hreng zui ta a ni.