Japan leh Australia-in thawh dunna zau zawk siam remti

Japan prime minister Sanae Takaichi leh Australia prime minister Anthony Albanese-te chu nimin khan Australia Parliament House-ah an inkawm a, ram pahnihte thawh dunna zau zawk siam an remti. A bikin West Asia-a indona thleng meka vanga khawvel puma supply chain dinhmun a derthawn mek karah, energy security, defence leh minerals lamah thawh dunna thuk zawk siam an remti a ni.

Australia hi Japan-in liquefied natural gas a lak luh zinga a zatve thawn thawntu a ni a, Japan hi refined gasoline leh diesel-a Australia supplier lian ram panga zinga a tel bawk a ni. Inremna an siam chu ram pahnih mipuite an hlawkpui ve ve tur a nih thu Albanese chuan a tarlang. Nimina an inbiaknaah hian China, Southeast Asia, Pacific Island ramte bakah nuclear chungchangte an sawi dun bawk.

Takaichi hian Japan PM atana lak luh a nih hnua a vawi khatna turin Australia a tlawh a, nimin khan Canberra-a Australian War Memorial a tlawh a ni. Japan PM-in a tlawh hma hian ram pahnih defence minister-te chuan Australia-in Japan designed indo lawng a leina turin, USD tld 6.5 man contract an lo ziak tawh bawk a ni.