Philippines-ah tlang kang vangin chhungkaw 300 chuang sawn chhuak

Philippines-ah kar liam ta kartawpa Mayhon tlang kang thlengah vut sa nasa taka a invawrh chhuah avangin chhungkaw 300 chuang chu hmun him lamah sawn chhuah an ni tih nimin khan official-ten an sawi.

Philippine Institute of Volcanology and Seismology director, Teresito Bacolcol chuan Mayon tlangah hian January aṭang khan nasa vak loin vut sa a invawrh chhuak reng a, mahse, Inrinni liam ta zanah khan nasa takin a invawrh chhuak ta tih sawiin, hei hian thingtlang khaw 87 chuang a nghawng tih sawiin, vut sa leh meikhu nasa vangin motor-a tlante tan pawh khaw hmuh theih chin a tawi phah hle tih an tarlang. He thil thleng avang hian hliam leh thi erawh an awm lo nia report a ni.

Camalig khaw mayor, Caloy Baldo chuan vut sa chhah tak invawrh vang hian mipui pawh an chiai nasa hle tih a sawi a, thlai chinna farm-te a tichhia a, ran vulh thi pawh an awm niin a sawi. Nimin lamah erawh a hlauhawm zual chu a reh tawh niin a tarlang.

Philippines-ah vek hian nimin khan Samar thliarkarah magnitude 6.0-a nain lir a nghing a, chhiatna liantham report erawh a awm lo nin police-te chuan an sawi. Lir nghin ṭanna hi tuipui kama San Julian khua aṭanga km 9 vela hlaah a ni.