Israel PM atan Bennett leh Eisenkot duhtu tam zawk

Israel mipuite ngaihdan lakah, an ram prime minister atan prime minister nilai, Benjamin Netanyahu aiin prime minister hlui, Naftali Bennett leh Yashar! Party hruaitu Gadi Eisenkot duhtu an tam zawk.

Lazar Research leh Panel4all ten mipui ngaihdan an lak, nimina an tihchhuahah zawhna chhangtu zinga 46% chuan Bennett chu PM atan an duh a, Eisenkot duhtu 44% awmin, Netanyahu duhtu hi 41% an ni thung. Israel ram inthlanpui hi kumin October thla hian neih a ni dawn a ni.

Bennett hian nikum April thla khan party thar, Bennett 2026 a din a, kar hmasa khan eptu hruaitu, Yair Lapid kaihhruai Yesh Atid ('There Is a Future') party inthlan neih tura tana thawk dun turin an inchhunfin a, 'Together' party an din a ni. Kum 2021 khan an an pahnih thawk dun hian Netanyahu kaihhruai sorkar an lo hneh tawh a; mahse, Israel-Palestinian buaina chungchangah an inlungrual theih loh avangin thla 18 hnuah an sorkar chu thlak a ni zui leh nghal a ni.

Gadi Eisenkot hi kum 2015-2019 chhung khan Israel Defence Force chief of staff a ni a, prime minister hlui Ehud Barak khnuaiah military secretary a lo ni tawh bawk. Palestinian leh Israel ram dinna tur, two-state solution thlawptu a ni bawk.