Iran leh US inbeihah invau tawn reng

Iran leh US chuan inremna siam dan kawng zawnga inbiak thawh hnihna an kalpui chhunzawm theih loh hnuah, inbeihna thar thawh lehah an invau tawn leh reng tawh a ni.

US president Donald Trump chuan US chuan Iran nena indona chu a ṭan thar leh a ngaih maithei tih a sawi a, Iran pawhin US hian a bei thar leh a nih chuan an chhan letna na tak leh rei tak an pek tur thu an sawi ve bawk. Iran president Masoud Pezeshkian chuan US navy-ten Iran port an dah chu beihpui thlakna chi khat ang a ni, a ti.

Iran hian an port dansak an nih vangin Strait of Hormuz a khar ve leh bawk a, hei hi indona avang leh, an dikna chanvo venhimna tura tih a nih thu Iran foreign ministry thupuangtu, Esmaeil Baghaei chuan a sawi. International law an kalh loh thu a sawi a ni. Indona thlen hnuah Iran-in Gulf ram dangte a beih tel chhan pawh Islam ram bei tura US an thawhpui vang niin a sawi bawk.

US leh Iran invau tawn mek leh, Iran-in Gulf ram dangte pawh beih tela a vau leh avangin Ningani khan UAE chuan an ram mi leh sate chu Iran, Lebanon leh Iraq rama zin a khap a, heng rama awm mekte pawh chhuahsan thuai turin a hriattir a ni.