Singapore court-in Palestinian thlawptu hmeichhe 3 sum chawitir

Singapore court chuan nimin khan hmeichhe pathum, kum 2024-a dan loa Palestinian thlawpna lantira kawngzawh huaihawttute chu USD 2,300 ṭheuh chawi turin a hrem.

Activist pathum - Mossammad Sobikun Nahar, Siti Amirah Mohamed Asrori leh Kokila Annamalai te hian kum 2024, February thla khan Gaza Strip-a indona thleng mekah Palestinian-te an thlawpna lantir Singapore-ah President chenna in panin kawng zawh an huaihawt a ni. Prime Minister hnenah Israel nen an inzawmna tihtawp tura ngenna lehkha theh luh an tum a, kawngzawhnaah hian mi 70 vel an tel.

Singapore-ah hian khuahkhirhna a khauh avangin nawrh huaihawt a thleng khat hle. Thuneitute chuan Israel-Gaza indona kaihhnawihah nawrh emaw, punkhawm emaw buatsaih an khap bawk a ni. Mahse, khap a ni chungin activist pathumte hian kawngzawhhi an huaihawt lui a, hei vang hian nikum June thla khan thubuai siamsak an ni. Trial court chuan an pathum hian a lo ngaidam tawh a, mahse, nimin khan High Court chuan ngaihdam an nihna hi sut lehin, sum a chawitir leh ta a ni.