Russia-in ralthuam tel loin Victory Day parade nei dawn

Russia chuan Indo II-naa Nazi Germany hneh an nihna champha pualin karleh hian Victory Day parade a buatsaih leh dawn. Mahse, kuminah chuan kum dang ang loin tank, missile leh ralthuam dangte tel loin parade hi neih a ni dawn tih Defence Ministry chuan a tarlang.

Moscow-a Red Square-ah May 9 hian parade hi neih a ni dawn a, kum 20 dawn chhunga military equipment tel loa parade neih hmasakna ber tur a ni. Kum dangah chuan he hun hi Russia-in a ralthuam leh sipai hmanrua ṭha a neihte pholanna atan a hmang tel ṭhin. Hemi ni hian Red Square bakah ram chhung khawpui hrang hrangah parade hi neih a ni ṭhin bawk.

Russia president Vladimir Putin chuan US president Donald Trump nena Nilaini zana an inbiaknaah, Victory Day holiday pualin Ukraine nena inkahhai puan a inhuam thu a sawi. Trump pawhin ṭha a tih thu a lo hrilh ve bawk. Mahse, Ukraine lam chuan hemi chungchangah hian sawi engmah an la nei lo thung. Nikumah khan Victory Day pual hian Putin chuan May 7 aṭangin darkar 72 chhung Ukraine nena inkahhai a lo puang tawh a ni.