Iran Foreign Minister-in Russia a tlawh

Iran leh US in inbiakna thawh hnihna an neih tur a tlawlh hnuah, Iran foreign minister Abbas Araghchi chu nimin khan Russia a tlawh a, Russia president Vladimir Putin a hmu dawn nia sawi a ni.

Araghchi hian Russia a pan hma hian Pakistan leh Oman te a lo tlawh tawh bawk. Pakistan prime minister Shehbaz Sharif, military chief Asim Munir leh foreign minister Isaq Dar te a hmu. Russia leh Iran state media-te chuan Aragchi hian president Putin a hmuh bakah, official dangte pawh a hmu dawn tih an tarlang.

US president Donald Trump chuan Pakistan khawpui, Islambad-a inbiak thawh hnihna neih US aiawha a special envoy Steve Witkoff leh a makpa, Jared Kushner-te zin tur chu Inrinni khan a cancel. Iran chuan inbiakna neih a duh takzet a nih chuan an be thei ang tiin a sawi.

Iran National Security and Foreign Policy Commission thupuangtu leh Parliament member ni bawk, Ebrahim Rezaei chuan inbiakna neih tura palai hna thawktu, Pakistan chu US president Trump-a duhdan lam chauh ngaih pawimawhah a puh a, America duh dan sawisel zawngin an ṭawng chhuak duh lo niin a puh. Pakistan chu an ṭhianṭha tak ram ni mah se, inbiakna neih tura palai hna thawk tur chuan a tlak lo tih a sawi a ni.