Israel ram inthlanpui neih turah PM hlui pahnihte thawk dun dawn

Israel ram inthlanpui, kumin kumtawp lama neih turah prime minister Benjamin Netanyahu kaihhruai ṭangrual sorkar paihthlak tumin, prime minister hlui pahnih - Naftali Bennett leh Yair Lapid-te chuan an party chhunfinin an thawk dun dawn tih an sawi.

Bennett leh Lapid-te chuan joint news coference an neihah, an kaihhruai Bennett 2026 leh There is a Future party-te chu inthlanpui neih tur atan chhun fin an ni dawn a, party thar chu 'Together' tih a ni dawn tih an sawi. "Kan tu leh fate tan kan ding dawn a ni a, Israel ram chuan a kalphung a thlak a ngai tawh," tiin an sawi. Bennett chu party tharah hian hruaitu a ni ang. Bennett hi kum 54 mi niin, tech millionaire leh army commander hlui a ni. Lapid hi kum 62 mi ni tawhin, TV news anchor hlui a ni.

Kum 2021 inthlanpuiah khan Bennett leh Lapid hi thawk dunin an chak a, ṭangrual sorkar an lo siam tawh a ni. Mahse, Israel-Palestinian buaina chungchangah an inlungrual theih loh avangin thla 18 hnuah an sorkar chu thlak a ni zui leh nghal a ni. Kum 2022-ah inthlan nei lehin, Israel prime minister dinhmun chelh rei thei ber, Netanyahu a rawn chak leh ta a ni.

Pathianni khan prime minister Benjamin Netanyahu chuan Telegram lamah Bennett leh Lapid te thawhdun tum thu hi post-in, 'A hma pawhin an lo ti tawh a, an ti nawn leh dawn a ni," tiin, sorkar an siam rei loh chungchang chu a kap zui bawk.