Pakistan PM-in Iran President a bia

US leh Iran-in inbiakna an neih theihna atana hma latu, Pakistan chuan ram pahnihten inbiakna an chhunzawm leh theihna turin theihtawp a la chhuah zel. Pakistan prime minister Shehbaz Sharif chuan Inrinni khan Iran president Masoud Pezeshkian chu telephone-in a bia.

Pakistan Prime Minister Office chuan hruaitu pahnihte hi minute 50 chhung vel inbiain, boruak awm mek dante leh, Middle East-a boruak muanawm a awm theihna tura hma lakna te an sawi dun a ni, a ti . Shehbaz chuan tun hnaia ram hruaitu hrang hrang a biak dan chungchang pawh hrilhin, hei hian inremna a awm theihna tura inbiakna neih leh a nih theihna atana an hmalaknaah pawh a puih ngei a beisei thu a sawi. Iran-in a thawhpui ṭhat avangin lawmthu a hrilh bawk.

President Pezeshkian pawhin Pakistan PM bakah Field Marshal Asim Munir leh deputy prime minister Ishaq Dar-te chuan inremna a awm theihna atana an hnathawhte avangin lawmthu a hrilh ve bawk. Middle East-a boruak muanawm chu Iran-in a duh a ni tih a sawi a, hemi rual hian Iran leh Pakistan inlaichinna chu a chak chho zel ang tih a rin thu a tarlang.

Pakistan khawpui, Islambad-a US leh Iran aiawhten inbiakna an neih thawh khatnaah inremna an siam thei lo a, hei vang hian inbiakna an neih chhunzawm leh theihna atan hian Pakistan chuan palai hna a thawk mek a ni. A tirah chuan ram pahnihte hian inbiakna nei chhunzawm turin an inhawn thu an sawi a, mahse, US-in Iran lawng chawlh hmun aṭanga lawng lut leh chhuakte a dan vang leh, Iran lawng a hrensak hnuah Iran chuan thutlukna a la siam thei lo a ni. Hetih lai mek hian kar liam ta Zirtawpni khan Iran foreign minister Abbas Araghchi chuan Pakistan a tlawh a, Inrinni zing khan Sharif leh Army chief Asim Munir te a hmu a ni.