Japan hmar lamah ni nga chhung ram a kang tawh

Japan ram hmar lam, Iwate Prefecture-ah kar liam ta aṭang khan ram nasa takin a kang a, nimin khan a ni ngana niin ram hectare 1,373-a zau a kang tawh a ni. Nimin thleng khan ram kang hi 7% vel chauh an la thunun thei.

Sorkar chuan ram kang ṭhelh tur hian kangṭhelhtu 1,400 leh self-defence force 100 a tir a ni. Kangmei chhuak vang hian Otushchi district a chengte dinhmun pawh a him lo a, chhungkaw 1,541 chu insawn chhuak tura hriattir an ni tawh. He khua hian kum 2011-a lirnghing leh tsunami thleng vang hian an khaw mipui hmun 10-a ṭhena hmun khat dawn an lo chan tawh a ni.

Otsuchi mayor Kozo Hirano chuan self-defence force-te hian ram kang hi helicopter hmangin an ṭhelh tih a sawi a; mahse, khua a ro leh thli a tleh tel avangin kang mei hi a darh chak hle niin a sawi. Kangmei chhuah chhan hi hriat chian a ni lo a, chhui mek a nih thu a sawi bawk.