UK-in kum 2008 hnu lama piangte hnena cigarette hralh khap

Britain parliament chamber pahnih chuan January 1, 2009 leh a hnu lama piang chinte hnena cigarette hralh khapna tur, The Tobacco and Vapes Bill a pawm.

Health minister Wes Streeting chuan he thil hi an rama health sector lama hmalakna chhinchhiah tlak a nih thu sawiin, mei zu lo generation hmasa ber an awm theih phah dawn a, an taksa tana ṭha lo leh ngawlveina lak aṭangin a veng dawn a ni, a ti. Public health charity, Action on Smoking and Health (ASH) director Hazel Cheeseman pawhin bill chu mipui hriselna dinhmun siamṭhatna pawimawh tak a nih thu a sawi. UK-a Labour party sorkar hian nikum June thla khan disposable vap hralh a lo khap tawh bawk. Hei hi a man a tlawm bawk avangin ṭhalai naupang zawkte zingah a lar hle. England bikah kumtin meizuk leh a kaihhnawih natna avangin mi 75,000 vel an thi ziah a, hei hi kum khata an rama mitthi awm zat hmun lia ṭhena hmun khat vel an tling tih National Health Service (NHS) chuan a tarlang.

Kum 2022 khan New Zealand chuan kum 2008 hnu lama piangte hnena cigarette hralh khapna dan siamin, khawvela hetianga dan siam hmasa ber a ni. Mahse, kum 2023-a sorkar a inthlak khan kum khat pawh an hman tlin hmain he khapna dan hi an sut leh a ni.

Nikum November thla khan Maldive sorkar chuan January 1, 2007 nu lama piangte hnena cigarette hralh khapna a siam ve leh bawk.