Iran-in Strait of Hormuz-ah lawng a kap leh

Iran paramilitary Revolutionary Guard chuan nimin zing khan Strait of Hormuz-a bungraw phur lawng lian pakhat kal chu an kap leh. He thil US president Donald Trump-a'n Iran nena inkahhai an puan mek a pawhsei thu a sawi hnu lawka thleng a ni.

United Kingdom Maritime Trade Operations (UKMTO) centre chuan Libya ram flag inzarna lawng hi zing dar 7:55 velah kah a nih thu an sawi a, lawng hi chhe mah se a thawk zingah hliam leh thi an awm lo tih an tarlang. Kangmei chhuak leh a chhehvela harsatna thleng a awm lo nia sawi a ni bawk. Lawnga thawkte chuan Strait of Hormuz kaltlang phalna an nei tih an sawi. UKMTO chuan Revolutionay Guard-te hian gunboat aṭanga an kah hma hian lawng hi engmah hriattir lawk leh tih din lawk pawh an nei lo niin an sawi. Hetih lai hian Iran lam chuan ṭum eng emaw zat warning an pek thu leh, an ngaih pawimawh loh avangin an kap ta niin an sawi ve thung.

Iran-in lawng a kahna hmun hi Oman hmarchhak lam, tuipui mel 15 vela hlaah a ni. He thil thleng vang hian UKMTO chuan lawng dangte pawh fimkhur turin a chah nghal a ni.