Ukraine khawpuia inpawng kahna thlengah mi 6 an thi

Ukraine khawpui, Kyiv-ah Inrinni liamtaa inpawngkahna thlengah mi paruk an thi a, hliam eng emaw zat an awm bawk. A hnuah a bul hnai supermarket-ah mi eng emaw zat an hreng zui bawk. Mahse pawikhawihtu hi a hnuah police-ten an kap hlum zui ve nghal a ni.

Pawikhawihna thlenna hmun hi khawpui chhim lam, Holosiivskyi district-ah a ni. Interior minister Ihor Klymenko chuan silai hmetpuaktu pawikhawihna chhan tak hi hriat chian a la ni lo tih a tarlang. Kawtthler mite a pawng kahnaah mi pali an thi a, a hnuah supermarket-ah mi eng emaw zat hreng zuiin, a mi hren zinga pakhat a kaphlum leh bawk.

Supermarket-a mi a hren laiin pawikhawihtu hi inpe tura tiin, police-te chuan biain minute 40 vel hun an pe a ni. Mahse, an ngenna hi a chhan duh loh avangin police-te chuan an kap zui a, an kap hlum ta a ni.

Ukraine prosecutor general, Ruslan Kravchenko chuan pawikhawihtu hi kum 58 mi, Russia khawpui Moscow aṭanga kal a nih tih sawiin, a silai hman pawh official-a register a nih thu a sawi. Permit pek a nih dan hi chhui chian nghal mek a ni.