Hormuz Strait hawn a nih theihna atan France leh SKorea in thawh dun tum

France president Emmanuel Macron leh South Korea president Lee Jae Myung-te chuan Strait of Hormuz hawn a nih theihna atan leh, West Asia buainain khawvel pum economy a nghawng buaina tihziaawm a nih theihna atan thawh dun an remti.

Ram hruaitu pahnihte hi South Korea khawpui, Seoul-ah an inhmu a ni. Macron hian kum 2017-a France President a nih hnuah SKorea a tlawhna hmasa ber niin, Asian tour a neih mekah a tlawh tel a, a hmain Japan a lo tlawh tawh bawk.

Iran-in US leh Israel in an ram an beih avanga khawvela tui kawng pawimawh, Strait of Hormuz a khar avangin khawvel pum oil supply a nghawng a, ram tam takin harsatna an tawk tawh a ni. Hetih lai hian US president Donald Trump chuan an thawhpui ramte chuan Hormuz Strait hawng tura nawrna US an thawhpui ṭha lo tih sawiin, he tui kawng hawn tir tur hian a hmangtu ram hrang hrangte mawhphurhna a ni vek tih a lo sawi tawh a ni.

Nimina meeting an neihah hian Macron chuan West Asia buaina tihziaawmna a nih theihna turin ram pahnihte chuan hma an la thei tih a sawi. Strait of Hormuz hawn a nih thuai theihna tura an thawhdun ṭhat a ṭul thute a sawi bawk.

Lee leh Macron chuan technology, energy leh area dang dangah ram pahnihte thawh dunna nghet leh zau zawk siam an remti bawk. SKorea leh France official-te chuan nuclear fuel supply chain-a thawh dunna tur inremna an ziak nghal a ni.