Nepal PM hlui Oli chhuah turin phut

Nepal prime minister hlui, KP Sharma Oli thlawptute chu nimin khan Kathmandu-a Naya Baneshwor area-ah an pungkhawm. Oli hi Inrinni liam tak khan nikuma Gen Z kaihhruai nawrh huaihawtte beih an nih dan chungchangah mawhphurtua puhin man a ni.

Oli-a party, Communist Party of Nepal (Unified Marxist-Lennist) leh an thawhpui pawl hrang hrang member eng emaw zat chu nimin khan pungkhawmin, chhuah nghal tura an phutna thuziakte an keng a, hei bakah Oli man a nih dan chu politics lama phuba lak tumna niin an sawi bawk. Kar liam ta Inrinni leh Pathianni pawh khan Oli chhuah phutin nawrh an lo huaihawt tawh a, riot police-te nen innawr buaiin UML mil leh sa eng emaw zatin hliam an tuar.

Kar liam ta Inrinni khan Oli bakah home minister hlui, Ramesh Lekhak te chu man a ni a, Pathianni khan Kathmandu Distreict Court chuan judicial custody-ah ni nga awm turin a ti a ni. Mahse, man a nih hnu lawkah Oli hi a hriselna ṭhat loh avangin Tribhuvan University Teaching Hospital-ah entir a ni a, hospital-ah a la awm a ni.

Oli nupui, Radhika Shakya chuan court-ah a pasal man a nih dan chu dan kalh a ni tiin petition a theh lut bawk. Supreme Court chuan petition hi a ngaihtuah a, mahse Oli chhuah tirn tur order erawh an siam duh lo a, sorkar lam thuneitute hnenah dan ang taka man a nih chhan sawifiah turin a ti thung.