Nepal PM hlui Sharma Oli man

Nepal prime minister thar Balendra Shah kaihhruai sorkar thar a din hnu lawk, kar liam ta Inrinni khan prime minister hlui KP Sharma Oli chu kum 2025-a Gen Z kaihhruaia nawrh huaihawtte beih let an nih kaihhnawiha Kathmandu-ah man a ni.

PM hlui Oli bakah home minister hlui Ramesh Lekhak man an ni bawk. Hruaitu hlui pahnihte hi nikum September 8 leh 9-a Gen Z nawrh huaihawtte security force hmanga beih let a, mi 76 thihna thlengah mawhphurtua puhin man an ni. Oli-a party, Communist Party of Nepal (Unified Marxist-Lennist) secretary, Mahesh Basnet chuan Oli man a nih dan chu politics lama phuba a ni tiin, PM thar Balendra Shah kaihhruai sorkar thar chuan rorelna dik lo takin a kalpui nghal a ni, a ti. Oli man a nih hnu hian CPN (UML) chuan emergency meeting nei nghalin, PM hlui chhuah tura an phut thu an tarlang.

Nepali Congress hruaitu leh House of Representative member, Arjun Narsringha KC pawhin thil thleng hi hleih nei lo leh lang tlang taka chhui a ni tur a ni, a ti. Gen Z nawrh huaihawt laia sorkar building hrang hrang,Supreme Court leh Government Secretariat Singhdurbar beih a nih dante chhui chian a phut.

Home minister hlui leh Rashtriya Prajatantra Party Nepal (RPP-N) leader Kamal Thapa chuan Oli man a nih dan chu a sawisel bawk a, sorkar thar chuan phuba lak tumna kawng a zawh a ni tiin, sorkar inrelbawlna ṭha awm tur chuan dan leh dunte dik taka zawm a ngai tih a sawi ve bawk. Oli man a nih hnu hian Kathmandu-a Chabahil are-ah UML mi leh sate chuan nawrh an huaihawt nghal bawk a ni.

Sorkar thar lak luh anih hnuah, kar liam ta Zritapwni khan PM Shah kaihhruaiin cabinet meeting hmasa ber neih a ni. Meeting-ah hian Gen Z nawrh huaihawt chungchanga high-level commission chhuina report tihchhuah chu kalpui nghal an rel a ni.