Panel-in Nepal PM hlui Oli thubuai siamsak rawt

Nepal rama nikum September thlaa Gen Z kaihhruaia nawrh huaihawtnaa tharum thawhna leh mi 76 thihna thleng chungchang chhui tura din, panel chuan prime minister hlui K.P Sharma Oli chu a ngaihthah avanga mi tam tak thihna dang zo loa puhin a chungthu ngaihtuah turin a rawt.

Panel hian Nilaini zan khan report a tichhuak a, nikum September thla ni hnih chhung nawrh huaihawt vanga buaina chhuakah khan mi 76 an thi a, hliam 2,522 an awm niin a tarlang. Sorkar report hmasaah chuan thi zat hi 77 niin an sawi. Nawrh huaihawt vang hian Oli leh a kaihhruai sorkar chu paihthlak an ni zui bawk a ni.

Kum 74 mi, Oli chu Gen z nawrh huaihawt ṭan nia nawrh huaihawtte laka silai hmehpuah dang duh loah puhin, sorkar hotu lu ber a nih avangin a ṭha lam emaw, a chhe lam emawah pawh mawhphurtu a ni, tiin report-ah an tarlang. Report hi phek 970-a chhah a ni a, Oli-a home minister Ramesh Lekhak leh polic hotu hlui Chandra Kuber Khapung te pawh mawhphurtu zingah an tel a, thubuai siamsak an ni tur a ni, an ti bawk. Oli leh mi dang pahnihte hi panel rawt anga thubuai siamsak a, thiam loh chantir an nih chuan kum 10 thleng lung-in tantir theih an ni ang. Mahse, dan lam thiamte chuan thubuai siamsak an nih hmain sorkar chuan police-ten an lakah criminal investigation an neih phawt a ngai a ni tiin, panel report behchhan ringawt chuan charge sheet theh luh leh jail tantir theih an ni lo, tiin an sawi.