Belarus President-in North Korea tlawh

Belarus president Alexander Lukashenko chuan Nilaini khan ni hnih cham turin North Korea-ah a zin a, official-a NKorea a tlawhna hmasa ber a ni. Belarus leh NKorea hi Russia-Ukraine indona thleng mekah Russia thlawptu ram an ni.

Alexander Lukashenko hi Pyongyang-ah 21 gun salute hmangin lo lawm a ni a, Kumsusan mausoleum-ah NKorae hruaitu hluite zahna lantirna pangpar a dah a, Russia president Vladimir Putin-a'n pangpar a thawn pawh a dah tel bawk.

Belarus President chuan an dinhmun tawn mekin Belarus leh North Korea ram inlaichinna chu a tiṭha zual tih sawiin, a cham chhung hian thawh dunna tur inremna 10 vel ziah an tum tih a sawi bawk.

Kim Jong-un leh Lukashenko te hi nikum September thla khan Beijing-a Tiananmen Square-a military parade buatsaihah an lo inhmu tawh a, hemi ṭum hian Kim chuan an rama zin turin a sawm a ni.