London-a Jewish community ambulance 4 hal

London-a Jewish community organisation ambulance pali chu nimin zing khan hal a ni a, he thil hi Juda huatna kaihhnawih thil nena inzawm nia an ngaih thu police-te chuan an sawi.

Metropolitan police chuan thuchhuah siamin, Golders Green-a Jewish Community ‌Ambulance service ambulance hal a nih thu leh, pawikhawihtute chhui mek a nih thu an sawi. Heng ambulance-te hi non-profit volunteer organisation, Hatzola-te ta a ni.

London Fire Brigade chuan kang ṭhelh turin kangṭhelh motor pali leh kangṭhelhtu 40 tirh nghal an nih thu an sawi a, ambulance-a cylinder-te a puak a, hei hian a bulhnai ina tukverh darthlalangte a nghawr keh niin an sawi. Hliam leh thi erawh an awm lo tih an tarlang. Zing dar 1:40 velah ambulance hal a nih thu hi an dawng a, zing dar 3:05 ah kangmei hi an ṭhelh mih thu an sawi bawk.

Kum 2023-a Palestinian firfiak pawl, Hamas ten Israel chhim lam an beih avanga Israel-in Gaza Strip-a Hamas laka beihpui thlak a indona a thlen hnuah, khawvel ram hrang hrangah Juda mi leh Juda hmunte beihna a thleng nasa tawh hle a ni.

Community Security Trust-a chief executive, Mark Gardner chuan Britain-a Juda awmte chu fimkhur turin a chah a, tun hnaiah Liege, Rotterdam leh Amsterdam-ahte Juda beihna a thleng tih a sawi. Britain-ah hian Juda 290,000 vel an awm.