Kum tam tak chhunga energy lam harsatna lian ber thleng thei : IEA chief

International Energy Agency hotu, Fatih Birol chuan West Asia-a indona chuan khawvel huapin kum tam tak chhunga energy lama harsatna lian ber a thlen thei a ni tiin, boruak awmdan chu a ṭha tawh lo hle a ni, a ti.

Nimina Australia khawpui, Canberra-a chanchinthar lakhawmtute a kawmnaah, Birol chuan oil lama harsatna thleng chho mekah, IEA chuan Asia leh Europe-a sorkar hrang hrangte berawnin, a ṭul dan azira an oil chhekkhawlte pek chhuah belh dan tur a sawipui a ni, a ti. "A tul a nih chuan kan tih ngei a ngai. Thil awmdan kan ngaichang ang a, market dinhmunte zirchiangin member-te pawh kan sawipui dawn a ni," tiin a tarlang. March 11 khan IEA member ramte chuan khawvel huapa crude oil man a san chhoh zel avangin an oil dahṭhat, barrel mtd 400 pek chhuah an lo remti tawh a ni.

Birol chuan Middle East buaina thleng mek chuan kum 1970 chhoa oil lama buaina ṭum hnih thleng leh, Russia-Ukraine indoanin gas lama harsatna a thlente belhkhawm aiin a nghawng a nei na tawh zawk tih a sawi. He buaina thleng mek chinfelna pawimawh hmasa ber chu Hormuz Strait hawn a nih thu a tarlang.