Afghanistan-in an ram hospital beiah Pakistan puh

Afghanistan sorkar thupuangtu, Hamdullah Fitrat chuan Thawhṭanni zan khan Pakistan-in an ramah airstrike neiin, Kabul khawpuia ruihhlo ngaite enkawlna damdawi-in an kap a, mi 400 vel an thi tih nimin khan a sawi.

Hamdullah Fitrat chuan X-ah hemi chungchang hi tarlangin, damdawi-in pawh a chhe nual tih a sawi. Mi 400 an thih bakah mi dang 250 in hliam an tuar bawk a, building hi a kan avangin nimin zing thleng khan kangmei ṭhelh hna hi thawh a ni, a ti. Hospital beihnaa thi zinga a tam zawk hi damdawi-in damlo enkawl lai an ni.

Pakistan chuan Kabul leh Afghanistan hmarchhak lam bialah airstrike an neih ngei thu a sawi a, mahse hospital erawh an kap fuh tel lo tih an sawi thung. Civil mi awmna hmun an bei tel lo tih an sawi.

Afghanistan official-te chuan ram pahnihte hi ramria an inkah hnu lawkah, Kabul khawpuia hospital hi beih tel a nih thu an sawi a, ramria inkahna thlengah hian mi pali an thi tih an sawi bawk. Pathianni khan Pakistan aṭanga mortar shell kah chhuah chuan Khost province-a thingtlang khaw eng emaw zat fuhin, chenna in tam tak a tichhia tih an tarlang bawk.

Hetih lai hian Pakistan president Asif Ali Zardari chuan Afghanistan-a Taliban sorkar chuan kar liam ta khan drone hmangin Pakistan a bei a, civil mi tam takin hliam an tuar tih a sawi ve bawk. Kabul khawpuia hospital an bei tel nia Afghanistan lamin an puhna chu phain, Taliban firfiakte hmunhma leh an ralthuam dahna hmunte chauh an bitum tih Pakistan Ministry of Information chuan a sawi bawk a ni.