Iran-in Gulf ramte a bei chhunzawm zel

United Nations Security Council (UNSC) in Iran-in Gulf ram hrang hrang a beih titawp tura phutin resolution pass mah se, Iran chuan a ṭhenawm ramte a la bei chhunzawm zel.

Nimin khan Iran-in drone hmanga a kahna avangin Dubai airport bul a kang a, mahse, thil tihchhiat liantham a nei lo. Kangmei chhuak pawh reiloteah ṭhelh niin, airport hi hun rei vak lo khar a nih hnuah hawn leh nghal a nih thu thuneitute chuan an sawi.

Iran hian drone leh missile 1,800 chuangin United Arab Emirates (UAE) a bei tawh a, Gulf ram dangte aiin a bei nasa zual a ni. Gulf ram a beihnaah Iran hian US hmunhma te chu a bitum ni mah se, civilian infrastructure te pawh a kap tel a, airport, port leh oil facility-te a bei tel a ni. Pathianni zan zanlai aṭang khan drone 60 chuang chu Saudi Arabia ramah a kap tawh bawk a ni.

UAE president Sheikh Mohamed bin Zayed Al Nahyan leh Saudi Arabian Crown Prince Mohammed bin Salman-te chu nimin khan inbiain, Iran chetdan chu an dem takzet tih an sawi. An ram venhimna turin a ṭul anga hma an lak tur thu an sawi. Gulf Cooperation Council (GCC) ramte baka UK leh Jordan chuan thuchhuah siamin, Iran an dem thu an sawi a, a ṭhenawm ramte a beihna titawp tura an phut thu an tarlang.