Iran war-ah sipai 140 vel an hliam

US chuan February 28 aṭanga Iran ram donaah an sipai 140 vel an hliam tih a sawi a, a tam zawk chu hliam tenau an ni tih a sawi bawk.

Pentagon thupuangtu, Sean Parnell chuan Thawhlehnia thuchhuah a siamah, Operation Epic Fury kalpui a nih aṭanga sipai hliam zinga 108 chuan an duty an chhunzawm leh tawh tih sawiin, mi pariat chu an hliam a nasat avangin enkawl mek an la ni, a ti. Iran beihna a thlen hnua Iran-in Kuwait leh Saudi Arabia a beih letnaah US sipai an thi bawk a ni.

US hian Iran a la beih chhunzawm zel a, defence secretary Pete Hegseth chuan Iran beih nasat a nih ber hun a la thleng dawn tih a la sawi chauh bawk. US Joint Chiefs of Staff General Dan Caine chuan America sipaite chuan Iran-a an target 5,000 chuang an kap fuh tih a sawi.

Iran pawhin a tlawm mai dawn lo a, a bei let zel dawn tih a sawi leh bawk. Iran Parliament speaker Mohammad Bagher Qalibaf chuan Iran-in inkahhai puan a rawt dawn nia thuthang awm chu thu dik lo a ni, a ti. Supreme National Security Council hotu, Ali Larijani chuan US vauna chu Iran-in a hlauh loh thu sawin, anni aia lian pawhin Iran chuan an nuaibo thei lo a, amahni zawk chu nuaibo an nih zawk lohna turin fimkhur turin US chu a chah zui a ni.