Energy man sang chungchang G7 hruaituten sawi ho

Iran war thleng mek avanga khawvel puma oil man a sang leh, oil indaih lohna hlauhthawnna thleng mek chungchang chu nimin khan France president Emmanuel Macron kaihhruaiin Group of Seven, G7 hruaituten an sawi ho.

G7 energy minister-te chuan oil man sang avanga hma lak dan turte an sawi ho a, hetih lai hian oil reserve pek chhuah chungchangah erawh an inlungrual thei rih lo. An oil reserve te pek chhuah a nih hmain, International Energy Agency (IEA) chuan thil awmdan uluk takin zirchiang leh phawt se an ti. IEA hian Thawhlehnia emergency meeting a neihah, oil man a tlakhniamna atan member ram 32-te chu an oil reserve te pe chhuak turin a rawt a, hei hi pawm a nih chuan IEA member ramte oil pek chhuah hi barrel mtd 182 chuang a tling thei dawn a ni. Mahse, rawtna hi member ram zawng zawngin an pawm vek a ngai thung.

Thawhṭanni khan oil man hi a kum li chhunga a san ber ṭum a thleng a, mahse, Thawhlehnia US president Donald Trump-a'n Middle East-a indona chu a tawp thuai dawn tih a sawi hnuah oil man hi 11% in a tlahniam leh nghal. Nimin pawh khan a la tlahniam zel a, barrel khat USD 87.75 ah a tla thla tawh.