Nepal prime minister thar tur Balendra Shah

Nepal ram inthlanpui, kar liam ta Ningania neiha rapper aṭanga politician-a inlet, Balendra Shah, Balen tia hriat lar kaihhruai Rastriya Swatantra Party (RSP) chuan hnehna an chang a, kum 35 mi Shah chu Nepal prime minister thar a ni dawn.

Balen hian nikum September thlaa Gen Z nawrh huaihawt hnua prime minister aṭanga paihthlak, kum 74 mi K.P Sharma Oli chu Jhapa-5 bialah vote 49,614 in a hneh a ni. He bialah hian CPN-UML hruaitu, Oli hi kum 1990 aṭang khan inthlan vawi rukah a lo chak tawh a, a bial hima a ngaih a ni. Mahse, tun ṭum inthlanah chuan vote 18,734 chauh a hmu pha a, Balen hian vote 68,348 a hmu thung.

Inthlan result kimchang hi tihchhuah la ni lo mah se, Balen kaihhruai RSP hian inthlan neihna, bial 165 aṭangin seat 59 la tawhin, a bak seat 62 ah hma an hruai mek bawk. A pahnihna, Nepali Congress nen an inthlau hle a, anni hian seat pakua an la tawh a ni. Oli-a party, UML chuan seat pathum chiah an la. Vote share-ah pawh an inthlau hle a, RSP hian vote tla aṭanga a hmuh zat hi 53% niin, Nepali Congress-in 16.59% leh UMLA in 13% an hmu ve bawk.