China-in official 19 a ban

China top legislative body, National People's Congress (NPC) Standing Committee chuan official 19 a ban a, an zingah hian sipai lam official pakua an tel. Ban zingah hian People's Liberation Army (PLA) Ground Force commander Li Qiamoming leh PLA Navy commander hlui Shen Jinlong pawh an tel a ni.

Official-te ban an nihna chhan hi sawi a ni lo a, kar rei vak lo liam taah khan president Xi Jinping chuan general leh a thawhpui hnai tak ni ṭhin, Zhang Youxia chu inkaihhruaina dan bawhchhiaah puhin a lo ban tawh bawk.

China president atana lak luh a nih hnuah Xi hian eiruk do beihpui thlakna a kalpui fo a, official eng emaw zat ban an lo ni tawh a ni. Xi chuan eirukna chu rorellai, Communist Party tana hlauhawm ber a ni tih a sawi a ni. Mahse, sawiseltu lam chuan hei hi politics lama a khingpuite dinhmun tihhniamna hmanruaah a hmang niin an puh ve thung.

Kar lehah hian China rama political meeting pawimawh, Two Sessions neih a ni dawn a, hei hi China legislature, National People's Congress (NPC) leh political advisory body sang ber, Chinese People's Political Consultative Conference annual meeting a ni. March 4 aṭanga 11 thleng neiin,he hunah hian sorkarin kum nga chhung atana a hmalakna tura ruahmanna a siamte a puang dawn a ni.