SKorea president hluiin hremna pek ngaihtuah ṭha turin ngen

South Korea president hlui, jail-a tang mek Yoon Suk Yeol chuan kum 2024 December thlaa sipai thuneihna sang pekna, martial law a puan avanga thiam loh chan tir a, dam chhung tang tura hremna pek chu ngaihtuah ṭha leh turin a ngen.

Yoon hi kar liam ta khan Seoul Central District Court chuan dam chhung tang turin a hrem a ni. Mahse, Yoon chuan court thutlukna siam hi thil awm lo tak a ni tiin,an rama martial law a puan chu an ram leh mipuite ṭhatna tura tih a nih thu sawiin, a chungthu an ngaihtuahnaah judge-te chu ṭanlam nei saah a puh bawk.

Kum 2024, December 3-a Yoon-a'n martial law a puan hian darkar ruk chauh a awh hman a, sut leh nghal a ni. Martial law puan a nih hnuah Parliament chu police leh sipaite a ventir a, mahse, parliament member-te chuan paltlang luiin, vote hmangin a thupek tihchhuah hi an hnawl a, cabinet-in a sut leh nghal a ni.

A thiltih avang hian Yoon hi hemi kum December 14-ah a chawlh tir niin, kum 2025 aoril thla khan Constitution Court chuan president a nihna aṭangin a ban zui bawk. July thlaah man leh niin, martial law a puan kaihhnawihah thubuai pariat siamsak a ni a, kar liam ta Ningani khan hremna tur hi tihchhuah a ni. Yoon chuan martial law hman chuan an ram inrelbawlna thunun tumtu, liberal-te laka invenna tura thil ṭul leh pawimawh a ni tih a sawi a, mahse Seoul Central District Court chuan a chet dan chu helna lam chawh chhuah tumna, leh ram dangte inrawlh tir tumnaah a puhsak. Dan kalhin police leh sipaite parliament lak tir a tum a, politics lama a khingpuit pawh a mantir bawk tiin a sawi. A chungchang chhuitu, special prosecutor chuan thi tura hremna pek a phut bawk a, court thutlukna hi appeal an tum ve bawk niin an sawi.

South Koea hian thi tura hremna hi kum 1997 hnuah a hmang tawh lo a ni. Yoon hi kum 1996 hnua South Korea president ni tawh zinga dam chhung tang tura hrem hmasak ber a ni bawk.