US-ah vur tla nasa vangin state ṭhenkhatah emergency puang

US-ah vur tla nasa leh vur thli tleh avangin state eng emaw zatah emergency puan a ni a, thlawhtheihna service a bahlah phah nasa hle a, Thawhlehni khan flight 8,000 chuang cancel leh tihkhawtlai a ni. Thli tleh hi US hmarchhak lamin an tuar nasa zual a, kawngte khar a nih bakah zirna in hrang hrang pawh khar a ni bawk. Thuneitute chuan pawimawh tawp a nih loh chuan zin chhuak lo turin mipui an chah.

New York khawpuiah chuan Pathianni leh Thawhṭanni khan vur tla hi inches 20 dawna chhah a tling. Mayor Zohran Mamadani chuan Pathianni zan aṭanga Thawhṭanni tlai lam thleng khan state of emergency a puang a ni. Providence-ah vur tla hi inches 32.8 tlingin, an state-a vur a tlak nasat ber record a tling. Massachusetts governor Maura Healey pawhin vur tlak nasat avangin Pathianni khan emergency a puang a, hnathawktute pawh in lamah awm rih turin a ti. New Jersey-ah pawh emergency puan a ni a, governor Mikie Sherill chuan state mipuite chu fimkhur turin a chah bawk.

Vur tla nasa leh thli tleh vang hian thingkung leh power line eng emaw zat an tlu bawk a, Thawhlehni khan chenna in nuai 5 chuangin power supply an nei lo a ni.