EU palaiten Board of Peace director hmu

European Union palaite chuan nimin khan US president Donald Trump-a'n Gaza Strip puala a din, Board of Peace director an hmu. Gaza tana board hma lak tum dan bakah, Russia-Ukraine indona chungchangte an sawi a ni.

President Trump chuan Board director atan hian Bulgarian politican, UN diplomat Nikolay Mladenov a ruat a ni. Board of Peace zawm tur hian Trump chuan ram hrang hrang sawm mah se, ram tam zawkin an la zawm lo. EU member zingah Hungary leh Bulgaria chuan board hi an zawm a, EU candidate ram Turkey, Kosovo leh Albania te an zawm bawk. A bak EU ram dang chuan an la zawm lo a; mahse kar liam ta Ningania board meeting hmasa neihah Austria, Croatia, Cyprus, Czech Republic, Finland, Germany, Greece, Italy, Netherlands, Poland, Romania leh Slovakia ram chuan observer an tel tir tho a ni. Hetih lai hian board thlawp lo EU ram dangte chuan meeting-a observer tir ramte chu sawiselin, thil an tisual niin an sawi thung.