Iran zirlaiten sorkar laka lungawi lohna lantir

Iran-a university zirlaite chuan Inrinni liam ta khan sorkar laka lungawi lohna lantirna lian tham tak an huaihawt. Zirlaite leh sorkar thlawptute inkarah innawr buaina a thleng zui bawk.

University hrang hrangah nawrh hi huaihawt a ni a, zirlai pungkhawmte chuan sorkar demna thute an aupui a ni. An ram pawisa hlutna tlahniam leh, thil man sang zel duh lohna lantira tun hnaia nawrh huaihawtte sorkarin security force hmanga a beih let avanga mi tam tak thihna thleng an dem thu an sawi. An ram hotu lu ber, Supreme Leader Ayatollah Ali Khamenei chu dictator tiin an sawi bawk a ni. Hmun ṭhenkhatah innawr buaina thleng mah se man erawh an awm lo nia hriat a ni.

US-based Human Rights Activists News Agency (Hrana) chuan January thlaa Iran rama nawrh huaihawt kaihhnawihah khan mi 6,159 an thi a, an zingah hian naupang 92 an tel niin a tarlang. Hetih lai hian sorkar lam chuan nawrh huaihawt vanga buaina chhuakah mi 3,100 an thi a, thi zinga a tam zawk chu security force an ni a, heng bakah civil mi nawrh huaihawtte kut tuar tam tak an awm bawk niin a sawi thung.

US sorkarin nawrh huaihawtte a thlawp avangin Iran nen pawh an inkar a chhiat zual phah hle a, Iran-in tharum hmanga nuarte a bei let zel a nih chuan US sipaite inrawlh tirah president Donald Trump chuan a vau a ni.