Hong Kong sorkarin chenna in kang lei sak dawn

Hong Kong sorkar chuan February 6-a Tai Po district-a Wang Fuk Court apartment complex-a chenna in kang chu a leisak dawn a, hei hi he in kang tuartu, mi 2,000 dawnten chenna in dang an neih theihna tura a ruahmanna a ni.

In kang ta hi a ram lei loin feet khat bial HK dollar 8,000 zel angin a leisak dawn a, a rate hi kangmei tuartuten chenna tur in dang an leina tur pawhin a ṭha tawk nia an ngaih thu deputy financial secretary, Wong Wai-lun chuan a sawi. Hemi rual hian sorkar hnenah an in hi hralh ngei ngei tura tih an ni lo a, an duhthlanna a nih thu a sawi nghal bawk.

Sorkar chuan in leina atan hian HKDtld 6.8 a ruahman a, relief fund aṭanga thawh tur nen a sum sen tur hi HKD tld 2.8 vel a nih rin a ni. Hei bakah insurance compensation te pek a nih hunah a senso hi a la tlakhniam leh rin a ni bawk.

Social Welfare Department-in survey a neihah, Wang Fuk Court-a in nei zinga 74% chuan an in leisak hi an duh niin an sawi a, 9% erawh chuan hralh loa chei ṭhat sak an duh zawk thung.