Venezuela-in tang tam tak chhuah theihna tur bill pawm

Venezuela parliament,National Assembly chuan politics kaihhnawih thila mante ngaihdam a, chhuah an nih theihna bill siam chu a pawm. He bill hi law-a chantir a nih hnuah jail-a tang mek, politican, activist, lawyer leh mi dang eng emaw zat chu chhuah an ni thei dawn a ni.

Acting president Delcy Rodriguez chuan thla hmasa khan bill hi Parliament-ah a pu lut a, hun eng emaw chen sawi ho a nih hnuah an pawm ta a ni. Hman a nih thuai theihna turin acting president pawh hian a hming a ziah hnan thuai rin a ni. Sawi honaah eptu lam pawhin bill hi an thlap a, Venezuela mi tam tak tawrhna tihtawp sakna tur a ni tih an sawi.

Bill-ah hian kum 1999 hnu lama mante a huam dawn a, heng zingah hian kum 2024 president thlanna vuakveta buaina chhuaka mante pawh a huam tel ang. 2024 inthlan neih zawha nawrh huaihawt leh tharum thawhna thleng kaihhnawihah khan mi 2,000 chuang man an ni a, man zingah hian kum tling lote pawh an tel.