Osaka khawpui water system siamṭhatna atan gold bar kg 21 thawh

Japan-a Osaka khawpui water system siamṭhatna atan hming thup mi pakhatin gold bar kg 21 a thawh a, hei hi yen tld 500 (USD mtd 3.6) hu a tling.

Osaka mayor Hideyuki Yokoyama chuan Ningania press conference a neihah, khawpui water system hlui tawh tak siamṭhatna tur hian nikum November thla khan pek an nih thu a sawi a, gold bar thawhtu hian a hming puanzar a duh lo tih a sawi bawk. Osaka khawpuiah hian mi maktaduai thum vel an cheng a, Kansai bialah awmin Japan khawpui lian pathumna a ni a, commercial hub a ni bawk.

Japan ram khawpui dangte ang bawkin Osaka khawpuia tui lakna leh paihna pipe te hi an hlui tawh hle. Ram pumah water pipe hman mek zinga 20% chuang chu a service hun chhung tura duan, kum 40 an pel tawh a ni. Hei vang hian a him tawk tawh loh hlauhthawnna pawh a lian hle. Kum 2024 khan Osaka khawpuiah hian kawng hnuaia tui pipe phum put ṭum 90 chuang record a awm a ni.

Osaka water system siamṭhatna tura gold bar thawhtu hian a hma pawhin municipal huam chhunga water system siamna atan yen 500,000 a lo thawh tawh bawk.