Imran Khan-a fapaten a pa tlawh phalsak an dil

Pakistan prime minister hlui, Imran Khan-a fapate pahnih, London-a cheng Suleiman Khan leh Kasim Khan-te chuan Pakistan jail-a tang, a pa hriselna dinhmun chu a ṭha tawh lo hle nia sawiin, Pakistan-a an kal theihna turin visa an dil a, a pa tlawh chu phalsak turin thuneitute an ngen.

Imran Khan-a lawyer chuan kar liam ta khan Supreme Court hnenah Khan-a mit dinglam hian khua a hmu ṭha thei tawh lo niin a hrilh. Mahse, Thawhṭanni khan medical board chuan enkawl a nih hnuah a vung te a reh a, a khaw hmuh pawh a ziaawm leh tawh niin an sawi thung.

Khan-a fapate pahnih, Kasim (26) leh Sulaiman (29) te hi a nupui hmasa ber, British socialite leh filmmaker Jemima Goldsmith nena an fate niin, an inṭhen hnuah Jemima hi London-ah a fate pahnih nen hian an kir a ni. Khan-a fate chuan a pa medical report chu a dik ngei em tih an chiang lo tih sawiin, nikum September thla hnuah a vawi khatna atan kar liam ta Ningani khan a pa hi biak phalsak an nih tih an sawi. A hma chuan a pa hian a hriselna lam dinhmun a sawipui ngai lo a, mahse, an inbiakna hnuhnung berah erawh a mit ṭha lo chu thla eng emaw zat enkawl loha a awm tawh thu a hrilh tih an tarlang. A pa an hmuh hnuhnun ber chu kum 2022, November thla a nih thu an sawi bawk. Pakistan-a kal nan thla hmasa aṭang khan visa an dil tawh a, mah se tun thlengin chhanna engmah an la dawng lo tih an sawi.

Imran Khan-a farnu, Aleema Khan leh Noreen Khan Niazi te chuan Khan-a medical report chu an awih loh thu sawiin, a tanna hmunah amah ngei hmuh phalsak turin thuneitute an phut. Khan hi an chhungkaw doctor pawh hmuh tir an phal lo niin an sawi a, a hriselna dinhmun dik tak hriat an duh thu an sawi a ni. Doctor thiam zawk enkawl tir tura Islamabad-a Shifa International Hospital-ah sawn turin an ngen.