New Mexico-in Epstein-a Zorro Ranch chhui chianna tur pawm

US-a New Mexico state lawmaker-te chuan Thawhṭanni khan hmeichhe naupangte khuaikhem leh sumdawnna atana hmanga puh, Jeffrey Epstein-a ranch, Zorro Ranch chhui chianna tur dan siam an pawm.

Zorro Ranch hi state khawpui, Santa Fe chhim lam mel 30 vela hlaa awm a ni a, he hmun hi Epstein-a'n pawikhawihna nasa tak a thlenna hmun atana a hman ṭhin nia sawi a ni. Ranch-a khuaikhem tawk, nung dama la awmte thu a zawtfiah dawn a, tualchhung mite pawh an thil hriat angte hrilh turin an ngen nghal bawk.

A chhui chiang tur, truth commission-ah lawmaker pali an awm a, anni hian ranch-a thlengte leh, he hmun a thil thleng ṭhin hretu state official-te dap chhuah hna an thawk ang.Hei bakah mipat hmeichhiat lama khuaikhemna thlenga inhnamhnawihte dap chhuah an tum dawn bawk.

A hmain Epstein hian Zorro Ranch-ah hian hmeichhe naupang eng emaw zat a khuaikhem nia puh a ni a, mahse hemi kaihhnawih bikah hian thubuai siamsak a ni lo thung. 'Playboy ranch' tiin tualchhung mite chuan a ranch hi an sawi ṭhin. Kum 1993-ah New Mexico Democratic governor hlui hnen aṭanga a lei niin, kum 2023 khan Texas-a sumdawng lian leh politician, Don Huffines hnenah a hralh a ni. Huffines chuan ranch chhuinaah hian thuneitute chu a thawhpui tur thu a sawi.

Epstein file-a a lan danin, ranch manager Brice Gordon chuan kum 2007 khan FBI hennah ranch-ah hian Epstein chuan a mikhualte tan tualchhunga massage therapist te a chhawr ṭhin niin a hrilh. An mi chhawrte hian khuaikhem an tawk ṭhin nia sawi a ni bawk.

US Department of Justice-in Eptstein file a tihchhuah chuan nghawng a la nei zel a,document-ah politician leh mi langsar tak tak ṭhahnem tak an lan avangin sawi pawh a hlawh hle. Hemi rual hian Epstein file-a langte erawh pawikhawihnaah an inhnamhnawih ve vek tihna erawh a ni lo. Mahse, inpuhna hrang hrang erawh a tam chho hle.

Billionaire Thomas Pritzker chuan Epstein file-ah a lan ve avangin Hyatt Hotels chairman a nihna aṭangin a chawl tih Thawhṭanni khan a sawi. Epstein leh a thurualpui Ghislaine Maxwell te nen inzawmna an lo neih chu pawi a titakzet tih a sawi bawk. Maxwell hi Epstein tana hmeichhe naupang thlem luh sak ṭhinah puh niin, kum 2021 khan thiam loh chantir a lo ni tawh a ni.