Russia-in WhatsApp khap a tum

Russia sorkar chuan messaging app hrang hrangah khuahkhirhna a siam mek zel a, an ram siam surveillance app hmang turin mipui nawr a tum a, hei vang hian WhatsApp chu khap a tum dawn niin company chuan a tarlang.

Telegram chu a him tawk lo nia sawiin Russia chuan a lo khap tawh a, hei vang hian WhatsApp pawh hi a khap ve leh dawn niin an ring. Russia-ah hian WhatsApp hmang hi mi mtd 100 chuang an awm a, Telegram pawh mi nuai telin an hmang bawk.

WhatsApp in thuchhuah a siam chungchang hi Russia sorkar lam chuan a la chhang lo thung. Mahse a hma pawhin Russia-a communication regulator, Roskomnadzor chaun WhatsApp chu dan siamte zawm turin warning a lo pe fo tawh a ni.

Sorkar hnuaia Tass Media chuan kumtir lam khan an ram pumah WhatsApp khap a ni dawn niin a lo tarlang tawh bawk. Russia sorkar chuan WhatsApp leh Telegram hian an ram danin a phut anga Russian user data pe tura an tihna an zawm duh lo niin a sawi. Kum 2025 aṭang khan thuneitute chuan an ram chhunga device hralh zawng zawngah max app chu install hmasak tir zel tura tih a ni. He platform hi sorkar hnathawk, zirtirtu leh zirlaite chu hmang ngei ngei tura tih an ni.