Madagascar-ah cyclone Gezani tleh vangin mi 31 an thi

Madagascar ramah thlipui, cyclone Gezani tlehin chhiatna nasa tak a thlen a, mi 31 an thi. Thil hian ruah a ken tel bawk avangin bial eng emaw zatah chuan tuilian leh leimin a thlen hlauhthawn avangin warning tihchhuah a ni.

Thlipui hian an ram huna Thawhlehni zan rei hnu khan darkar khata km 195 chuanga naa tlehin a nuai a ni. Madagascar ram hi ram rethei tak niin, mipui tam zawk chu an in leh lo pawh a ṭha lo hle. Hetih lai hian Indian Ocean aṭanga thlipui thawk an tuar fo a, kar hnih liam ta mai pawh khan thli na takin a lo nuai tawh bawk.

National Office for Risk and Disaster Management chuan an ram khawchhak lam, Toamsina khuah thlipui tleh vang hian chenna in eng emaw zat a chhiat thu sawiin mi 6,000 chuang chenna nei loin an awm a ni. Thlipui tlehin chhiatna a thlen vanga thi mi 31 an awm bakah, hliam tuar mi 36 an awm a, chin hriat lohin mi pali an awm bawk. Thi zinga a tam zawk hi Toamasina biala mi an ni a, he khuaah hian mi 300,000 an cheng a ni.

President Michael Randrainirina chuan thlipui tlehin chhiatna a thlen dante enfiahin Toamasina hi a tlawh a, harsatna tawkte pawh a hmu bawk. President Office chuan thli tleh hian he khua infrastructure 75% vel a tichhia niin a tarlang. January 31-a cyclone Fytia tleh vangin Madagascar ramah hian mi 14 an thi a, mi 85,000 velin an in leh lo an chhuahsan a ngai bawk.

United Nations chuan cyclone Gezani-in chhiatna a thlen siamṭhat nan leh, harsatna tawkte chhawmdawlna turin emergency response fund aṭangin USD mtd 3 a pe chhuak nghal a ni.