Bangladesh-ah polling station 50% chuang 'risk-prone' ah dah

Bangladesh ram inthlanpui chu vawiin hian neih a ni dawn a, boruak ṭha tak hnuaia inthlan neih a nih theihna atan police ṭhahnem tak duty tir an ni. Vote thlakna tur, polling station zinga 50% chuang chu buaina chhuah theihna, venhim ngai 'risk-prone' ah dah a ni. Polling station 90%-ah CCTV dah a ni dawn bawk.

Election Commissioner Abul Fazal Mohammad Sanaullah chuan tun ṭum inthlanahhian inthlan an neih tawha venhim hna thawktu tur dah tam ber a ni tih a sawi. Ram chhung hmun hrang hrangah inthlan ni hian law enforcement mi leh sa nuai 9.58 an duty dawn tih a tarlang. Inthlan ni leh a hnu lamah pawh boruak muanawm tak a awm theihna turin hma lak reng a ni, a ti.

Polling centre 43,000 vel siam a ni a, an ram khawpui Dhaka-a polling centre 2,131 zinga 1,614 chu 'risk-prone' ah dah tel an ni. Zing dar 7:30 aṭangin vote thlak ṭan a ni ang a, tlai dar 4:30 thleng hun hawn a ni ang. Vote nei mi 1,27,700,597 an awm a, an zinga 3.58% chu vote nei thar, first-time voter an ni.