Japan-ah vur tla nasa vanga thi 46 tling tawh

Japan ramah kar thum dawn chu khawvawt a zualin vur a tla nasa hle. Nimina Fire and Disaster Management Agency-in data a tihchhuahah, vur tlak nasat vanga thi hi mi 46 an tling tawh a, hliam 558 an awm bawk.

January thla tawp lam aṭang khan Japan hmar lam bikah vur a tla nasa zual a, traffic thlengin a nghawng buai a, chetsualna pawh a thleng nasa hle. Aomori bialah chuan vur tla hi chhah lam hi metre 1.3 te a tling a ni. Tokyo-ah Pathianni khan vur thlia a tleh bawk a ni.

Vur a tlak nasat avangin rel service pawh a nghawng buai a, rel tlan turte tihtawp lailawk an nih bakah ṭhenkhat an tlan hun tihkhawtlai a ni bawk. University entrance exam neih hunlai a ni a; mahse, university ṭhenkhat chuan vur tla vang hian entrance exam neih hun an sawn bawk. Thuneitute chuan vur tlak nasat zualna biala chengte chu vur tawlh awm mai thei tur laka inveng fimkhur turin an chah.