Spain leh Greece-in naupang tana social media khap rawt

Social media-in naupangah a ṭha lo lama nghawng a neih ṭhinte chu ram hrang hrangten an buaipui zel a, Spain leh Greece ram pawhin naupang tana social media khapna siam an rawt ve leh.

Spain prime minister Pedro Sanchez chuan social media chu ngawl vei theih a ni tih sawiin, an ramah kum 16 hnuai lam tan khap an duh tih a sawi. Greece pawhin kum 15 hnuai lam tan social media hi khap a tum niin sorkar lam thuchhuak chuan a tarlang bawk.

Spain PM Sanchez chuan social media platform-a inhuatna lam thu tihchhuah chungchangah social media executive-te a mawhphurtua ngaih a nihna tur dan chu sorkarin a siam dawn tih a sawi bawk a ni. Nikum August thlaa Spain ram mipui ngaihdan lakah 82% chuan kum 14 hnuai lam tana social media khap ṭha an tih thu an sawi.

Australia ram chuan nikum December thla khan kum 16 hnuai lam tana social media khapna siamin, khawvela a hmang hmasa ber ram a ni. Britain leh France pawhin naupang tana social media hman danah khuahkhirhna khauh siam dan an ngaihtuah mek bawk.

Dubai-a World Governments Summit neihah pawh naupangten social media an khawih nasatin an rilru leh taksa lam hmasawnna kawnga nghawng ṭha lo a neih dante pawh sawi ho a ni a, naupangte venhim a ṭul thute an sawi a ni.