Vietnam-in Truong My Lan-i thil neih hralh sak dawn

Vietnam chuan an rama bank bumna lian ber thlenga thiam loh chantir leh dam chhung tang tura a chungthu relsak, sumdawng hausa, property developer Truong My Lan-i thil neihte chu hralh a tum. Hralh tura a tih zingah hian Birkin bag pahnih leh luxury yatch pawh an tel.

Ho Chi Minh City Civil Judgment Enforcement Agency chuan awle vun aṭanga siam, Hermès Birkin bag pahnih hlut zawng hi mithiamte an chhut tir dawn tih an sawi. A yatch hi thla tharah lilam tum a ni bawk a, Vietnamese dong tld 49.3 (USD mtd 1.9) aṭangin chhiar ṭan a ni ang.

Vietnam rama bank lian pangana, Saigon Commercial Bank chu Truong My Lan hian a ruka thununin, company lem hmangin kum 10 chhung chu loan leh pawisa fai te a la chhuak ṭhin tih hriatchhuah a ni a, a sum tihchingpen hi USD tld 44 a tling. Khawvela bank sum tihchingpen lian ber zingah a tel a ni. Kum 2024, April thla khan court chuan thiam loh chantirin, thi turin a chungthu a relsak a, mahse, nikum June thla khan a appeal phnuah a hremna hi dam chhung tang tura tihnep sak a ni.