Japan court-in NKorea-a thlem luhte zangnadawmna pe turin ti

Tokyo court chuan North Korea hnenah kum eng emaw zat liam taa North Korea-a thlem luh, Japan mi palite chu zangnadawmna, yen mtd 88 (USD 570,000 ) pe turin a ti.

Mi palite hi kum 1960 ah khan North Korea chu hmun nuam lutuk tia thlem luh an ni a; mahse, an kal hnuah hrehawm taka awmin hna thawk tura chhawr luih an ni. A hnuah NKorea aṭang hian an tlan chhuak a ni.

Kum 1959-1984 inkar khan Japan-a Korean thlah cheng, Zainichi Korean zinga 90,000 chuang chu North Korea-a healthcare, zirna leh hna ṭha tak pek tiama thlem luh an ni. Mahse, an tiam angin engmah pek an ni lo a, farm leh factory-ahte hna thawka chhawr luih an nih bakah, an chetvel danah pawh khuahkhirhna siamin, a tam zawk chu an chhuak thei tawh lo a ni.

North Korea aṭanga tlan chhuak mi pangate chuan kum 2018 khan zangnadawmna pek phutin court-ah an zualko a, kum 2022 khan Tokyo district court chuan Japan thuneihna piah lam a ni tiin a hnawlsak. Mahse, kum 2023 khan Tokyo High Court chuan an case hi Japan thuneihna huam chhung a ni tiin a ngaihtuah a, North Korea chuan an dikna chanvo a palzut sak tih a sawi bawk.