Israel-in Gaza-a hren thi ruang hmu chhuak

Israel chuan Palestinian firfiak pawl, Hamas nen Gaza Strip-a inkahhai an puannaa an thil phut, an mi hren thi tawhte ruang hlan vek tura a phut zinga a hnuhnung ber ruang chu Thawhṭanni khan an hmu chhuak tih sipaiten an sawi.

Gaza-a hren ruang an hmuh hnuhnun ber hi police officer Ran Gvili ruang a ni a,ni 840 chuang hren a ni hman. A ruang hi enfiah a nih tawh a, Israel-ah phum a ni dawn tih sipai thuchhuah chuan a tarlang.

Israel in a phut angin Hamas in an mi hren, nungdama awmte chu a chhuah vek tawh a, thi tawhte ruang pawh hlan tura a tih chu pakhat tih loh hi an hlan tawh bawk a ni. A hnuhnung ber an hlan tur ruang hmuh chhuah a nih tak avangin, Gaza Strip-a inkahhai puan chhunzawmna turah kawng a sial phah beisei a ni.

Ruang an hmuh chhuah, Gvili hi Hamas-in kum 2023, October 7-a Israel an beih ṭum khan thah a ni a, a ruang hi Gaza-ah ah an hreng zui a ni. A chhungte leh ṭhianten 'Defender of Alumim' tia an sawi ṭhin a ni a, Hamas ten an that tih leh, a ruang Gaza-ah an la tih hi kum 2024 January thla khan thuneituten a chhungte hi an hriattir a ni.

Israel prime minister Benjamin Netanyahu chuan Gvili ruang hmuh a ni ta chu lawmawm a tih thu a sawi a, Israel tana pasalṭha niin, firfiak beihnaah a hma a hruai a, a hnung a rawn dawl leh a ni, a ti.

Hamas in Israel mi an hrente, nungdama awm leh thite ruang pawh hmuh kim a nih tak avangin Gaza Strip-a chengte chuan Rafah crossing chu hawng a, chhawmdawlna thawn luh turin an phut ve nghal bawk. Rafah crossing hi Egypt aṭanga Gaza Strip luhna pui ber a ni a, Israel hian Hamas mi hren thite ruang hmuh kim a nih hnuah hawn a remti dawn tih a lo sawi tawh a ni. Rafah crossing hi kum 2024, May thla aṭang khan hun tam zawk khar a ni a, nikum October thlaa inkahhai puan khan hawn tura tih ni mah se, Israel chuan Hamas-in an mi hrente ruang a pek kim phawt a phut a ni.