SKorea President hlui Yoon kum 5 tang turin hrem

Seoul Central District Court chuan nimin khan an ram president hlui, Yoon Suk Yeol chu kum 2024 December thlaa sipai hnena thuneihna sang pekna, martial law a puan kaihhnawihah kum nga tang turin a hrem.

Court chuan Yoon hi martial law a puan chungchangah a thuneihna hmang dik lo, document dik lo siam leh a chungthu ngaihtuahna tibahlah tuma puhin hremna hi a pe a ni. Judge-te chuan Yoon thiltih hian an ramah buaina nasa tak a thlen tih a sawi a, hetichung hian a thiltih avanga inchhirna tak tak a lantir lo niin a tarlang.

Nimina Yoon chungthu ngaihtuah lai hian courthouse pawn lamah amah thlawptu mi 100 vel an pungkhawm a, court rorel lai hi screen lianah live-a pek chhah a ni. Kalkhawm zinga ṭhenkhat chu judge-in thutlukna a puan lai hian lungawi loin an lo au buai a ni. Judge chuan President hlui hi an ram constitution leh dan leh thupekte venghim tur a nih laiin, a hnungchhawn san zawk a ni, a ti.

Yoon hi martial law a puan kaihhnawiha manna tur thupek tihchhuah hnuah, amah man tumte dang tura president bodyguard te hmanga puh a ni a, thutlukna a siam hma hian a cabinet pawh a rawn lo a, martial law a puan tur chu prime minister leh defence minister pawhin an pawmpui nia sawiin document siam chawp leh, hei hi a hnua tichhe lehah puh a ni a, heng thubuaiah hian thiam loh chantir a ni. Prosecutor-te chuan Yoon hi kum 10 tan tir an phut a, court thutlukna siam hi prosecutor leh Yoon a lam hian ni sarih chhungin an appeal thei ve ve ang.

Yoon an puhna hrang hrangte hi a dik lo niin a sawi ve thung. Manna tur thupek tihchhuah pawh dan loa tih a ni tiin, President-in emergency power a hman dawnin a cabinet member-te rawn vek a ngai lo tih a sawi bawk.

South Korea court hian thubuai siamsakte chu an tidik lo leh, mawh an phur a ni tia an pawm chuan hremna pek chungchangah ngaihnathiamna a pe fo a ni. Mahse, prosecutor-te chuan Yoon hian a thiltihah inchhirna leh pawi tihna tak tak a lantir lo tiin, hremna na thei ang ber pek a phu tih an sawi.

Kum 2021 khan South Korea court chuan president hlui, Park Geun-hye chu thuneihna hmang dik lo leh thamna laa puhna thubuaiah kum 20 tang turin a lo hrem tawh a ni. Mahse, a hnu rei loteah ngaihdam a ni.