SKorea prosecutor-in President hlui thi tura hremna pek phut

South Korea special prosecutor chuan an ram president hlui, Yoon Suk Yeol chu kum 2024, December thlaa sipai hnena thuneihna sang pekna, martial law a puan chungchangah thi tura hremna pe turin a phut.

Thawhlehni zana Seoul Central District Court-a Yoon chungthu ngaihtuahnaah, prescecutor chuan president hlui Yoon leh a defence minister ni ṭhin, Kim Yong-hyun te chuan kum 2023, October thla daih tawh aṭang khan Yoon-an thuneihna a chan reng theihna turin ruahmanna an lo siam daih tawh a ni, a ti. "Yoon hian democracy venhimna turin martial law a puang niin a sawi a; mahse, a thiltih dan hi ram danpui kal bakah, National Assembly leh Election Commission ngaih pawimawh lohna lian tak a ni. Martial law a puan hian democracy inrelbawlna a tichhe zawk a ni," a ti. A thiltih avang hian Yoon hian inchhirna tak tak a nei lo a, mipui hnenah pawh mumal taka ngaihdam dilna a nei lo a ni, tiin a sawi.

Kum 2024 December thlaa Yoon-a'n emergency-a martial law a puan hian darkar ruk chauh awh hman mah se, an ram pum a tibuai hman hle a ni. Kum 65 mi, Yoon chuan thuneihna a chan chhunzawm zel theihna tura puang nia puhna chu a pha a, an ram tihchhiat tumte hnawhbona tura a tih a nih thu a sawi thung. President a nih angin martial law puang thei a ni a, eptu lamin sorkar danbeh a, tihchhiat an tumna avanga he thil hi tih a nih thu a sawi a ni. A chungthu hi February 19 hian court-ah ngaihtuah chhunzawm a ni ang.